Thanksgiving

Für aui die wos nid wüsse: Thanksgiving isch ä Fiirtag wo ide USA und in Kanada gfiret wird. Ursprünglech chunnt er vode erste Migrante us Europa, de "pilgrims" (Pilgertvätere), wo in Nordamerika die erste Kolonie gründet hei. Hützutags wirds aber oft ou so chli aus Firtig zum Merci säge interpretiert und viu Familie hei ä Tradition wosi Dankesrede hei oder wo eifach jede am Tisch seit für was er oder sie dankbar isch. Mini Familie het das aber nid gmacht. Grundsätzlech wirds ähnlech wie Wiehnachte gfiret: D Familie trifft sech bi öperem deheime, es git ganz viu feins z'Ässe und me verbringt der Abe zäme (nume der Tanneboum und d Gschänkli fähle). D Kelsey, ar Jessica ihri Schwöschter wo in Boston, Massachussetts, am studiere isch, isch heicho übers verlengerte Wuchenänd. ds eigentleche Thanksgiving isch am Donnsti und am Friti isch Black Friday. Was das isch sägi de speter no. Uf jede Fau hei d Thanksgivingferie am Mittwuch agfange u am Donnsti simer aui zäme zum Paul sinere Schwöster hei gange go ässe. 

 Traditionellerwies gits Truthahn, aus ganzes zuebereitet. Bi aber ender ufs ässe konzentriert gsi u has drum chli verpasst es Foti vom ganze Truthahn z mache. Ha aber z gfüu mä gseht d Dimensione vo däm Feschtässe chli.

Derzue gits ganz viu Bilage. Ufem Foti isch nume e Teil dervo. S het würklech viu z'Ässe gä. Stuffing (s het mer niemer chönne erchläre wases ganz genau isch, aber s'isch ächt fein), Härdöpfustock, sone Art Fruchtsalat mit Chruschte, Spinatuflouf, usw. Weiss würk nüm aui Näme, sorry.

 hie der Pecan Pie (Walnusschueche)

und der Pumpkin Pie (Chürbischueche)

Apple Crisp (es Biud vo Google)

 S het ou no Öpfuchueche gä, wo ou sehr fein isch. Är isch aber zimlech angersch aus dr Öpfuchueche woni vo mim Mami kenne. Viiiu süesser und s het sone Chruste obedruf wo ou mega süess und mega fein isch.

Am Friti Morge früeh simer ufgstange für id Mall zgah go Black Friday Shopping mache. Black Friday isch immer der Friti nach Thanksgiving und es git super gueti Sales. Aues isch abegschriebe und d Lüt stöh zum Teil scho am Abe vorhär Schlange vorem Igang für die beste Sache z verwütsche. Mittlerwiele ischs nüm so extrem wie no vor paarne Jahr, zumindest hie ir nächi isch niene öpis eskaliert. Das isch wahrschinlech unger angerem ou wägem Cyber Monday - der Mänti nach Black Friday wo när im Internet ganz viu Sache abegschribe si für die wo sech dr Stress vom Black Friday nid wöi atue. D Jessica und ig si am 6:30 am Morge parat gsi zum ga, aber nächer isch d Mary Jo no imne anger Lade und noni parat gsi zum üs zur Mall bringe. Drum simer när schlussändlech ersch nachde 7ne losgfahre und hei scho s Gfüu gha aui Sache sige de wäg. Aber wie gseit, s'isch nüm so extrem wie früecher, und mir hei när eigentlech aues gfunge womer hei gsuecht gha. I hamer ä blau-wissi Jaggä im Forever21 kouft wo 50% abegschribe gsi isch und woni schones Wieli ha wöue choufe (mini Instagram Followers wüsse möglecherwies scho weli dasi meine). När hani no so paar chlini Sächeli und paar Wiehnachtsgschänkli kouft.

 Black Friday accomplishments

ig am nid-basic pose vorme Wiehnachtsboum ir Mall

 amne Black-Out-Game (aui lege schwarz ah)

 ä traditionell-hässleche Wiehnachtspulli

 üsi Halloween Kostüm

mis Team nachdäm mer d Regionalmeisterschafte gwunne hei 

 Elicott City, ä härzigi chlini Stadt

 es Panorama im Schoggilade

 mis Vivian-Maier-inspirierte Säubstportrait fürd Photoklass

 s Laurel Centre wiehnachtlech

und no paar Blüemli in Annapolis

Homecoming

Für aui wo no nie öpis ghört hei vo Homecoming probieris hie churz z erchläre. Es isch ide USA ä Tradition ar High School dases jede Herbscht ä Homecoming git, aber wie das när gnau usgseht isch gloubs ungerschiedlech. Uf jede Fau isches immer kombiniert mitem Homecoming Game, ämene American Football Match wo am Friti oder Samsti vorem eigentleche Homecoming Dance stadtfindet. A mire Schueu isches am Friti Abe gsi und es isch eigentlech eifach ä normale Match wos aber ou no so Aktione wie Spändeständ und es Spaghetti Ässe vorhär git. D Wuchä vorem Homecoming Dance isch ou spezieuer aus süsch. Es isch nämlech Spirit Week, was so viu wie Mottowuche heisst, und das bedütet, dass sech d Schüeler und Lehrer jede Tag nachme Motto oder Thema alegä/verchleidä. Das Jahr het SGA (d Schüelerverbindig, wo für so Sache verantwortlech isch) neui Täg igfüehrt wo viune nid so passt hei wüu si zimlech längwilig si gsi, und es hei sech nid aui verchleidet, was mi chli schad het dünkt. D Täg das Jahr si gsi:

Maryland Monday - Sache wo mitem Staat und der Flagge ztue hei
>vo denn hani kes Foti

Team Tuesday - Sache vo Teams

wüu mer ke Team Trikots gha hei, heimer eifach Twin Day gmacht (Zwillinge)

Holiday Wednesday - irgende ä Firtag (zb Wiehnachte)

Mardi Gras isch so wie Karneval in Boston

Theme Thursday - Thema nach Jahrgang (mir hei Beach gha)
>hani ou ke Fotis gmacht

Class Color Friday - Seniors si blau gsi

D Leslie het mis blaue Outfit no chli kreativer gmacht

Am Samsti isch när der eigentlech Homecoming Dance gsi. Wie dir vilech wüsset, hani es Date gha für dä Samsti, nämlech einä vo minä ängschte Kollege hie, der Ian. Usserdäm hani no zwöi vo mine Ustuschschüelerkolleginne iglade, d Marthe vo Norwege und d Luna vo Belgie und Mexiko. Mini Fründe vor Schueu si leider di meiste nid cho und d Jessica het o nid chönne dert si, wüu si mit ihrem Orchester es Konzärt in Phiadelphia gha het. Womer när aber ir Schueu si acho, si doch no zimlech viu Lüt dert gsi woni kenne. Der Tanz oder Ball oder wie ou immer het ir Turnhaue stadtgfunge und ide Gäng rundume het no so paar Sache gha, wie zb z'Ässe und z Trinke, Ping Pong Tische und sones Basketbauspiu. Die meiste si aber ir Turnhaue gsi und hei tanzet. D Schueu het ä DJ organisiert gha und dä het när (meistens schnäui) Lieder abglah. Di meischte Meidli hei ihri Schue abzoge und vore am Igang abgäh zum tanze. Nach es paar Stung isch das Ganze de ou scho wieder verbi gsi und mir si heigange. Hie hani no paar Biuder (woder vilech scho uf Facebook gseh heit). Es si leider wieder nid soo viu wüu ig das mit de Fotis irgendwie immer chli vergisse, aber hie si die woni ha:

Ig und der Ian

Marthe, ig und d Luna

Ig und d Homecoming Queen Jessica

Ir Homecoming Wuche isch no öpis angers gsi, nämlech d Senior Night vo mim Fuessbau Team. D Senior Night isch ei Match ir Saison - üblecherwies s letschte Heimspiu - wo d Seniors im Team (auso d 12. Klässler) verabschiedet, bzw. geehrt wärde. D Familie chunnt vorem Spiu ou ufe Rase abe und d Seniors wärde einzeln akündigt und es wird no verzeut was sie so gmacht hei, was si für Lüt si und was sie nach der High School vor hei (meistens i weles College aso i weli Uni si wei ga). S Team macht ou no Plakat mit de Näme vo ihrne Seniors und jedi vo ihne bechunnt ä Spirit Box. Das isch eifach sone Schachtle mit ihrne Lieblings Snacks und süsch no so chline Sächeli drin. Da ig hie ou idi 12. Klass gah, hani das aues ou becho, obwou i ja nid 4 Jahr hie id Schueu bi wie di angere. I ha ou Spiuzit becho i däm Match, obwou i süsch nid würklech viu Isatz ha.

mini Spirit Box

di angere Seniors im Team, Tina, Ally, Dana, Sofia, Mary, Julianne und Kayla

 mi grandios Isatz

Mary Jo, Jessica, ig und der Paul

#5

Genau ei Monet isches här siti zletscht mau öpis ha gschribe hie uf mim Blog und genau zwöi Mönet siti ir Schwiz abgfloge und z New York glandet bi. Auso di perfekti Glägeheit wiedermau es Update z ufe z'lade. 

Mittlerwile hani mi hie zimlech guet igläbt, ir Schueu isch scho d Heufti vom erschte Quartal verbi (s git hie kei Herbstferie), d Fuessbau-Saison louft guet o weni nid würklech viu Spiuzit ha ide Matche, und i hami langsam chli dra gwöhnt immer überau häre mitem Outo müesse gfahre z wärde. Mues aber säge dasi d SBB und BLS und vorauem o mis gliebte orangige Blüemli-Velo scho zimlech vermisse. So säubstverständlechi Sache ir Schwiz faht me scho afa schätze im Usland. Mir fäut übrigens ou s früsche Brot vom Beck und Chrüseliwasser (irgendwie verstöh d Amerikaner nid, wie ungloublech viu besser Wasser schmöckt, wes Bläterli drin het). Aber abgseh vo so paar Chlinigkeite chumi hie ganz guet klar.

Vor drü Wuche simer ir Houpstadt vo Maryland gsi und es isch nid wieme vilech würd dänke Baltimore, sondern Annapolis. Mir si dert chli umegloffe und ufs Naval Academy Gländ gange. Das isch sones College für wemä ufne Karriere ir Navy zuestüret. S Städtli het mer würklech gfaue, vorauem der Hafe: 

Ärdnussbutter-Schoggi

När hani ono paar meh Fotis vo Baltimore, obwoui nonid im Inner Harbor - z äuä beliebtischte Ziu, dr Hafe - gsi bi, gfaut mer Baltimore mega mite vile Backsteine in Kombination mit neuie Wouchechratzer.

we d Statue inere erreichbare Höchi isch

Am 22. Septämber het d Jessica Geburtstag gha und si het Tickets füre Hershey Park in Pennsylvenia becho. Hershey isch ä Schoggi-Marke, aber der Hershey Park isch ähnlech wie der Europapark ä Park mit Achterbahne und so zügs. Mir si mit zwöi Kollege gange, em Richard und em Ian. S'isch ächt e lustige Tag gsi und d Bahne si lässig gsi. Ou vo dert hani no paar Fotis:

dr Ian und ig amne Facepaint-Stand

Letscht Friti isch a mire Schueu s Pink Out Game gsi. Ds isch es Heimspiu vom American Football Team wo sech aui pink alege. Si hei ir Wuche vorhär pinkigi Tshirts verchouft und der Erlös geit ane Brustkrebsstiftig. Es isch auso ä Art vo Breast Cancer Awareness Aktion gsi. O weni z neonpink vode Tshirts extremscht hässlech finge hani füre guet Zwäck eid kouft und s när ou agleit. S'isch schlussändlech würk lustig gsi, mau so ganz in pink amne Football Game. 

 Ig und Jessica

das isch d Therese, am Ian sini Schwöschter