Ha gmerkt dases scho wieder lenger här isch siti z letstä mau öpis ha ufeglade hie. Aber äbä hie bini. Auso zersch mau über Wiehnachte hie in Amerika. Obwou's super warm isch gsi (öpe 22°C a Heilig Abig) het d Wiehnachtsstimmig nid gfäut. S het nämlech überau ungloublech viu Liechter und Dekoration gha. Mindistens jedes 2. Huus isch vou Liechter gsi, ufde Böim, im Gebüsch, süsch im garte, zum Teu sogar am ganze Hus verteilt. När bini amne Samsti no miter Leslie, enere Kollegin vor Schueu, uf Virginia abe nach Bush Gardens gange. Bush Gardens isch eigentlech ä Achterbahnpark, ähnlech wie der Europa-Park. Es isch ou so ufteilt i europäischi Länder und igrichtet nach dene Theme. Es het aues mögliche gäh, vo Dütschland, über Frankrich, Italie, Schwede zu Ängland, und überau hets Wiehnachtsdeko und vorauem ungloublich viu Liechter.
Ä Boum ir Mall
Ä Isschou in DC
Ig und d Therese
Bush Gardens
D Leslie und ig
Mini Zimetstärne
A Heilig Abe säuber düe die meiste hie nid wahnsinnig fire, vilech uswärts ässe mit der Familie aber meh ou nid. Obwou das zwar eigentlech chli schwierig isch eifach so z säge wüu ja aui Lüt vo verschiedene Länder chöme und verschiedeni Kulture hei. Zum Bispiu ar Jessica ihrem Fründ Ricardo sini Familie wo vo Mexiko isch firet am Heilig Abe und packt Gschänkli um Mitternacht us. Traditionellerwies "amerikanisch" isches aber so das der Santa Claus über Nacht ufe 25. Dezämber chunnt und ä Socke füut und Gschänkli bringt und viu Familiene lö ou Cookies und Miuch dusse für ihn. Das heimer zwar nid gmacht aber Gschänkli hets glich gäh, houptsächlech Chleider. Am namitag si nächer no Tante, Unku und Cousine verbi cho und d Gschänklizeremonie isch witergange und mir hei aui zääme gässe.
Mini zwöiti Gastschwöschter Kelsey und ig
Der Elvis inere Gschänklibox
Wie dir vilech heit mitbecho isch s ganze Gebiet zwüsche Washington DC und New York igschneit vom Schneesturm Jonas. Scho am Mittwuch vorere Wuche (drü Täg bevor der Sturm überhoutp acho isch) hei d Lüt agfange Hamsterichöif z mache und Miuch-, Eier- und Zibele-Regau si läär gstange ide Supermärkt. Bi üs in Maryland hets insgesamt zwüsche 50-100cm Schnee gäh und d Schueu isch sitem Fritig usgfaue und morn (der druf fougend Fritig) gömer immer noni zrüg id Schueu wüus offebar immer nonig überau gnueg sicher isch. Es isch zwar so dass bis gester tatsächlech no viu Strasse si igschneit gsi aber mindistens hüt würde die meiste Europäer scho wieder d Schueu afange. Aber s Problem isch äbe chli dass hie, wenn öpis schief geit und öper ufem Schueuwäg ä Unfau het wägem Schnee oder so würde die Lüt nächer vilech d Schueu verklage zum Gäud mache und drum mues immer aues komplett safe si. Mi störts uf jede fau gar nid, 6 Täg schueufrei z becho. Dr Schneesturm säuber isch nid extream gsi usser dases haut viu Schnee gä het und ou rächt windig gsi isch. Einisch isch der Strom usgfaue aber nume für paar Minute. Aues in auem isches eigentlich rächt witzig gsi, mir hei ou chönne go schlittle im und hingerem Garte und mir hei es Iglu bout.
ig und d Jessica bim schneeschufle am Samsti
d Strass vor üsem Huus am währendem Sturm
es Gartepanorama
