#5

Genau ei Monet isches här siti zletscht mau öpis ha gschribe hie uf mim Blog und genau zwöi Mönet siti ir Schwiz abgfloge und z New York glandet bi. Auso di perfekti Glägeheit wiedermau es Update z ufe z'lade. 

Mittlerwile hani mi hie zimlech guet igläbt, ir Schueu isch scho d Heufti vom erschte Quartal verbi (s git hie kei Herbstferie), d Fuessbau-Saison louft guet o weni nid würklech viu Spiuzit ha ide Matche, und i hami langsam chli dra gwöhnt immer überau häre mitem Outo müesse gfahre z wärde. Mues aber säge dasi d SBB und BLS und vorauem o mis gliebte orangige Blüemli-Velo scho zimlech vermisse. So säubstverständlechi Sache ir Schwiz faht me scho afa schätze im Usland. Mir fäut übrigens ou s früsche Brot vom Beck und Chrüseliwasser (irgendwie verstöh d Amerikaner nid, wie ungloublech viu besser Wasser schmöckt, wes Bläterli drin het). Aber abgseh vo so paar Chlinigkeite chumi hie ganz guet klar.

Vor drü Wuche simer ir Houpstadt vo Maryland gsi und es isch nid wieme vilech würd dänke Baltimore, sondern Annapolis. Mir si dert chli umegloffe und ufs Naval Academy Gländ gange. Das isch sones College für wemä ufne Karriere ir Navy zuestüret. S Städtli het mer würklech gfaue, vorauem der Hafe: 

Ärdnussbutter-Schoggi

När hani ono paar meh Fotis vo Baltimore, obwoui nonid im Inner Harbor - z äuä beliebtischte Ziu, dr Hafe - gsi bi, gfaut mer Baltimore mega mite vile Backsteine in Kombination mit neuie Wouchechratzer.

we d Statue inere erreichbare Höchi isch

Am 22. Septämber het d Jessica Geburtstag gha und si het Tickets füre Hershey Park in Pennsylvenia becho. Hershey isch ä Schoggi-Marke, aber der Hershey Park isch ähnlech wie der Europapark ä Park mit Achterbahne und so zügs. Mir si mit zwöi Kollege gange, em Richard und em Ian. S'isch ächt e lustige Tag gsi und d Bahne si lässig gsi. Ou vo dert hani no paar Fotis:

dr Ian und ig amne Facepaint-Stand

Letscht Friti isch a mire Schueu s Pink Out Game gsi. Ds isch es Heimspiu vom American Football Team wo sech aui pink alege. Si hei ir Wuche vorhär pinkigi Tshirts verchouft und der Erlös geit ane Brustkrebsstiftig. Es isch auso ä Art vo Breast Cancer Awareness Aktion gsi. O weni z neonpink vode Tshirts extremscht hässlech finge hani füre guet Zwäck eid kouft und s när ou agleit. S'isch schlussändlech würk lustig gsi, mau so ganz in pink amne Football Game. 

 Ig und Jessica

das isch d Therese, am Ian sini Schwöschter

#4

S'isch wieder einiges passiert i denä zwöi Wuche sit mim letschte Post. Ir Schueu hani mi langsam zimlech guet igläbt, vorauem Photography und Choir gfaue mer mega. Mir benütze houptsächlech auti Pentax Fiumkameras und ds isch ächt interessant und vorauem soo angersch aus eifach mitme iPhone chli Fotis für Insta z mache. S brucht viu meh Zit und Überlegige für jedes einzelne Biud mit der Beliechtig u auem. Freue mi scho wemer de nächst Wuche ändlech Abzüg vode Fotis mache. S het übrigens ono e Änderig gä i mim Stundeplan; anstatt Math hani iz ir erste Lektion Leadership. Die ersti Mathklass isch z eifach gsi u ir zwöite si aus nume 10. Klässler gsi u när hani gfunge i bruche eigentlech gar nid würk Math das Jahr. Ir Leadership Klass macht me schins so Gruppearbeite und Üebige zu Teambildig und äbä Leadership, aber i dene 3 Täg wonis fäng ha heimer ehrläch gseit nid grad viu gmacht. Aber s isch uf jede Fau e gueti Klass zum angeri Seniors kennälehre... :)

Letscht Wuche simer id Mall go shoppe und as Renaissance Festival wo z Maryland jedes Jahr stadtfingt. Mit Renaissance hets aber nid viu ztüe, d Lüt chöme eifach derthäre, s het Ständ mit ässä und Schmuck und Schwärter und jenstem angerem Züg und s het o Shows wie zb Jongleure und so Lüt i Rüschtige uf Rösser wo enang mit Lanzene a Bode schiesse. Viu Lüt hei sech o verchleidet - s het aues ender nach Mittuauter usme Fantasyfium usgseh - aber aui hei Spass gha und s isch o würklech rächt lustig gsi. :)

 hät nid dänkt dases das git

tatsächlech si d Portione rächt gross

ir Mall hets übrigens äs Karussell

Letscht Wuche hani ändlech chönne afa trainiere mitem Gator's Soccer Team. S het so lang duuret wüu mä hie für Sport z mache ä ganze Huufe Formular und Ungerschrifte vom Dokter brucht, damit me im Fau vomne Unfau nid d Schueu cha verklage. Ds isch chli der Nachteu dervo das d Lüt ds hie so viu mache, wenn irgendöpis passiert. Aber dank mim liebe Mami ir Schwiz het iz doch no aues klappt :) Nach zwöi Probetrainings bini iz offizieu teil vom Team und ds freut mi mega. Mir trainiere a jedem Wuchetag 2 Stung was für mi zimlech viu isch :0 aber wenigstens nimi ja so nid ganz so viu zue wieme de Ustuschschüeler nacheseit.. ;)

hie ä chline Teil vo mim neue Team

Geschter isch dr erscht (American) Football Heimmatch gsi und i bine natürlech go luege; mir hei 20:27 verlore - dr erscht Uswärtsmatch letscht Wuche 14:6 (o verlore). D Stimmig isch aber glich super gsi und aui hei Spass gha. Wüu d Jessica ir Marching Band isch wo ir Pouse spiut hani ni mit ihre chönne gah, drum bini mitem Ian gange woni am Spiu vorere Wuche ha kennäglehrt und wo d Fotis fürd Schueu macht. Wäge däm heimer o diräkt ufs Fäud chönne damiter d Spieler vo nöchem und d Zueschouer vo witem het chönne fötele. Währendem Spiu hani o no paar Meitli vo mim Team troffe wo aui ihri Gsichter wiss agmale hei - wiss isch d Heimfarb vode Zueschouer, aber d Spieler hei ihri blaue Jerseys anne, weiss o nid genau werum.

 Gator's Fanbase

üsi Cheerleader

Hüt simer uf Baltimore gange wüu d Jessica dört Orchester het gha. Während sie am Fagott spiele isch gsi si mir chli dürt Stadt gloffe, si aber nid so lang duss blibe wägem Räge. Ha usegfunge das mini nöi Jagge nid wasserfescht isch.. Hüt isch übrigens o z'erschte mau gsi wos hie het grägnet siti hie bi. Bimers gar nid gwöhnt ä ganze Summer fasch ohni Räge z vrbringe.. 

 Peppermint Lemon Sticks - ä Spezialität vo Baltimore

mä sugt düre Peppermint Stick dr Zitronesaft use, s'isch rächt fein :)

 womer ungerwägs amne Antiquitätestang si verbigloffe

und no ä verrägneti Strass

#3

I fah iz eifach mau dört ah woni z letschte mau ha ufghört: Am letste Samsti si d Jessica, der Michael und ig uf Washington D.C. gange u dert chli ir National Mall d Memorials go aluege. D National Mall isch nid es Shopping-Center wieni zersch dänkt ha, sondern eifach sone Art Park im Zentrum vor Stadt wome sozäge aui Sehenswürdigkeite ufme Huufä fingt. Mir hei so chli aus agluegt und i ha Fotis gmacht und mi wiene waschächti Tourischtin gfüut. Womer när müed si gsi vom ganze umeloufe simer wieder heigfahre wüu a däm Abä ono der Wächsu vo mire Arrival-Family zu mire Welcome-Family plant gsi isch. I bi auso mini Koffere wieder go packe und d Fisher's heimi uf Fulton übere zude Byrne's gfahre. Mir hei tschüss gseit und i ha mit Bob und Sally Byrne Znacht gässe. Es isch für mi zimlech komisch gsi, iz wieder ä neui Familie z ha, aber sie si mega nätt gsi und es het feins z'Ässe gä. Nachem Znacht heisi mer d Nachbere vorgsteut und mis Zimmer und s Hus zeigt und i ha scho wöue afa mit uspacke wo när s SMS vode Fisher's isch cho dass si mi gärn z ganze Jahr würde bi sich bhaute, sprich mini definitivi Gastfamilie wärde. Ds hetmi hönnä gfreut wüu i se nämlech aui scho gärn ha becho und i mi mit mire Gastschwöschter mega guet verstah. Ha när glich no dert gschlafe aber am nächste Tag nacheme AFS-Picknick bini scho wieder zrüg uf Laurel und ha ändlech aui mini Sache chönne uspacke und irume. 

Am Mänti isch dr erscht Tag ir High School gsi. Bi ehrläch gseit rächt nervös gsi, aber has überläbt. Hie hetme nume siebe verschiedeni Schueufächer wome meh oder weniger säuber ch uswähle (s git aber fürs College bestimmti Aforderige wie zb dasme vier Jahr Math und Änglisch gno het). Me het när jede Tag sächs Lektione Schueu (vom 7:20 bis am 14:10). Die vierti Lektion wächslet immer ab so dass me glich aui siebe Fächer het. I ha Math, Änglisch, Franz, Concert Choir, Psychlogy/Sociology, Photography und US-History gno. Gschicht isch für Ustuschschüeler und Nüntklässler obligatorisch, dh i bi aus Senior mit luter Freshmen ire Klass. Süsch bini eigentlech meistens mit angerne Seniors oder Juniors. I fahre übrigens tatsächlech mit denä klischeehafte gäube Schueubusse id Schueu aber si si ehrlech gseit rächt ungmüetlech und houprig. Süsch hani aber ä super ersti Schueuwuche gha usser em ufstah am sächsi.. 

eui Nora

No es paar Biuder vo Washington DC:

 National Bank Washington

 Im Hingergrund ds Washington Monument

 Ds Wiisse Huus

 Dr Brunne im World War II Memorial

 Ds Lincoln Memorial

 I vorem Lincoln Memorial Reflecting Pool

Lincoln

Dr Teich im Garte vode Byrne's: 

 Si hei sogar es Kanu i ihrem Teich ds isch öpä z beschte

Und no die Gäube Büs

Di erschti Wuche

Sit mim erschte Post isch zimlech viu passiert und i ha bishär chum Zit gfunge ä zwöite z schribe. Auso hie churz was aus passiert sich: Vom letschte Samsti bis am Dsischti simer in Greensboro in North Carolina gsi u derte s College go aluege für mini Gastschwöschter Jessica wüu si sech überleit sech dert z bewärbe. Der Campus isch riesig und d Uni het öpe 15'000 Studente. Mir si ono id Stadt Greensboro säuber u dert chli go umeluege und dürt Läde es bizli go shoppe. I hamer imene Vintage Store ä Jagge kouft und mache mer scho iz Sorge wieni aus mis Züg wieder zrüg id Schwiz bringe. Am Dsischti simer när wieder zrüg uf Laurel in Maryland, hei wägem Stou rund um Washington D.C. aber öpe acht stung gha anstatt füf.. 

Am Mittwuch si d Jessica und ig und ihri Kollege Michael und Joe is Six Flags America gange. Dert hets so Achterbahne und und Wasserbahne gha mitem Thema Superheudä. S isch zimlech lustig gsi, nume isch d Luft hie soo füecht dases eim viu heisser vorchunnt aus ir Schwiz wes zb 30°C warm isch. Aber ufde Wasserbahne het mä sech ja wieder chli chönne abchüele :)

Am Donnschti simer när scho wieder losgfahre, dasmau aber idi angeri Richtig, nämlech uf Delaware. Dert heimer ar Jessica iri beschti Fründin Ashlyn wo wäg vo Maryland zoge isch bsuecht. D Nachbarschaft wo sie wohnt isch so typisch amerikanisch wie's nume geit, bimer vorcho wie imne Fium. Hüt Morge simer zersch chli dürt Outlets wos dert het gange u när am Nami no churz a Strand. Hei aber leider ke Zit gha zum bädele, nume zum d Füess is Wasser ha. Iz bini wieder in Laurel, aber morn muesi mini Sache scho wieder packe wüu mini eigentlechi Familie wieder deheimä isch, ds heisst dasi ab morn z Fulton wohne. Vorhär gömer aber no chli uf DC go d Stadt aluege und vilech id National Mall. 

xx Nora

Six Flags America

D Jessica und ig mit Daffy Duck

Blick vor Bay Bridge zwüsche Maryland und Delaware

Angola Beach

Da wohnt d Ashlyn

No einisch d Bay Bridge

Und hie no der Elvis a sim Lieblingsplätzli

Dr erscht Tag

Gester Mittag am eis woni mi vo minere Familie ha verabschiedet gha und aui Träne tröchnet gsi si, isch mis Flugzüg vo Züri uf New York losgfloge. Mir si guet acht Stung ir Luft gsi und när am JFK Flughafe ir Bronx am haubi vieri acho. Mit es paar AFS Freiwiuige simer witergreist imne Bus zumne Hotel ir nechi, aber womer si dert gsi het sech usegsteut das mi Bus uf Baltimore grad sofort fahrt und i ha mis Gepäck usem Kofferrum gschrisse u bi i anger Bus gchlätteret. Mir si öpe drüehaub Stung ungerwägs gsi und hei vom Highway us ono d Skyline vo Manhattan chönnä betrachte und ig ha mis erschte amerikanische Znacht gfrämslet. S isch hönnä schön gsi, New York nume scho vo witem azluege. Fröie mi scho weni de mau mit mire Gastfamilie dert häre ga :)

Hüt Morge heimer zmörgelet und ds Buffet het mi zersch zimlech verwirrt.. Es isch eifach so Fertig-Food gsi wome när us Plastiktäuer isst und es het sogar ä Pancake-Outomat gha.
Hüt Abä gani de zu minere Arrival-Family wöu mini Gastfamilie (wo übrigens ou nume mini Welcome-Family für di erschte Mönet isch) im Moment ihri Tochter im College am bsueche isch. D Arrival-Family wohnt ou ir nechi und ihri Tochter geit ufdi glichi Schueu wie ig.

S isch nid eifach gsi, tschüss z säge..

Gseht nimau so ungsund us ;)

Lings im Biud isch Manhattan

Zwar nume vo witem aber mir hei glich 

hönnä Fröid gha :)