Prom & Boston & Graduation

Wie vielech es paar vo euch wüsse isches hie Tradition so öpis wiene Abschlussbau (Prom) z ha. Es isch ä Ball imne Saal wo sech aui schön mache und när derthäre gö go tanze. D Meidli hei aui bodelängi Chleider ah wo vo $150 ufe bis zu $700 choschte. Di meiste lö zuesätzlich ouno Haar, Makeup und Fingernegu professionell la mache und für d Meidli gits es Bluemearmband und fürd Giele e Asteckrose. D Giele lege genereu eifach ä Smoking ah, meistens farblich passend zum Chleid vom Meidli. Wie bim Homecoming fragt me enang ufne kreativi Art obme wot zämegah, Päärli gö immer zäme, aber oft sis ou eifach Kollege und Kolleginne wo aus "Dates" gö. Mi het ä Kolleg gfragt u mir si zäme mit vier angerne gange. Zersch heimer üs troffe zum Fotis mache, denn simer uswärts go ässe und när zum Hoteu wo der Prom isch gsi. Es het ä Saau mitere Tanzflächi gha und näbedra es Buffet mit Getränk, Häppli und Dessert. Ä DJ het für Musig gsorgt und die meiste Lüt si am tanze gsi, die angere si eifach chli umegstange. 

Mini Gasteutere hei zwöi Töchtere: d Jessica wo glich aut isch wie ig und d Kelsey wo 21 isch und in Boston studiert. Sie het dä Früehlig ihre Bachelor abgschlosse und drum simer fürnes Wuchenänd ufe uf Boston so dass mer ihri Abschlussfir (Graduation) hei chönne go luege. Mir si am Friti Morge früeh in Baltimore abgfloge und denn vom Boston Flughafe mit me gmietete Outo uf Newport gfahre. Dert simer eifach so chli dürs Städtli gloffe hei gässe und si nächer di grosse Villas ar Küste go aluege - sie sie ächt haubi Schlösser. Am Samsti simer in Boston downtown umegloffe und hei aui schöne Teile vor Stadt agluegt. När am Sunnti isch d Abschlussfir gsi, wo d Kelsey ihres Diploma het übercho und nach däm simer uswärts go ässe und denn scho wieder ufs Flugi hei. Ha us irgendeme Grund nid würklech viu Fotis gmacht aber hie si die woni ha:

Küste in Newport

Boston

D Fishers ar Graduation

New York vom Flugzüg us

Am Mittwuch drufabe isch ou scho ar Jessica ihri High School Graduation gsi und d Kelsey isch uf Maryland abe cho. Da ig ja nid würklech d Schueu abschliesse bini ou nid ar Graduation über d Bühni gloffe, was mi nid auzusehr stört und i bi drum eifach mit de angerne im Publikum ghocket.

NYC

Weder mir uf Instagram oder Snapchat fouget heiters äuä scho mitübercho, aber faus nid hie no d News: letst Samsti bini ändlech z New York gsi. Es isch ä Usflug mit öpä vierzg angerne Ustuschschüeler, Gastgschwüsterti, Gasteutere, und Fründe gsi. Mir si am Morge am sibni mitem Bus losgfahre und när ungefähr am eufi bim Rockefeller Center in Manhattan acho. Vo dert us heimer üs i chlini Grüppeli mit Chaperones ufteilt und hei der Tag so verbracht wie mer hei wöue. I bi mit zwöi angere AFS Schüelerinne, der Marthe und der Arina vo Norwege und Russland, gsi und emne Kolleg vor Marthe wo 18 isch (drum heimer kei angere Erwachsnige brucht). Mir si zersch chli ufem Times Square/Broadway umegloffe und hei när d Subway zur Brooklyn Bridge gno. Vor angere Site vor Brügg us heimer wieder d Subway gno, dasmau zum Central Park. Vo dert us simer eifach chli umegloffe im Park, im Zoo und ufder Upper East Side und när heimer ouscho gli wieder zrüg zum Bus müesse.

I weiss das vieli vo euch äuä säuber scho mau dert si gsi aber i bi haut nunmau rächt ä grosse Fan vo derä Stadt und wot umbe umbedingt zrügg u ha öpä 130 Fotis gmacht u drum teili iz hie ä Uswau dervo mit euch.

 Marthe und Arina

Apriu

Geng wie geng, mi letst Itrag isch wieder es Wili här und i hamer dänkt i cha euch aune es neus Update nid lenger vorenthaute. Es isch Afang Apriu und ds dritte Quartau a mire Schueu neigt sech am Ändi zue, d Früehligsferie si scho verbi und im Mai isch Prom und Graduation (Abschlusball und Abschlussfir). Uf der einte Site hani z Gfüeu es isch scho ä haubi Ewigkeit här siti mini Familie und Fründä z letste mau ha gseh und umarmt, aber uf der angere Site chunnts mer vor aus vergieng d Zyt wie im Flug. Ersch gad isch no Winter gsi und mir hei jedi Wuche ufne witere Schneetag ghofft (mini Schueu wird gschlosse bim gringste Schnee ufde Strasse wägä Unfaugfahr und wüu d Eutere d Schueu chönnte verchlage im Fau vomne Unfau). Und iz sitzi hie und überlege wasi aus so ha erläbt und wasi aus no vor mir ha. Das isch eigentlech öpä genau das woni scho zimlech sitem Afang drüber nachedänke, wasi erläbe und was nid und obi mi äch iz scho veränderet ha wie schinbar aui angere Ustuschschüeler oder Lüt wo lang im Usland si. Chas ehrläch gseit säuber nid so ganz gnau säge, ha viläch de meh Infos weni wieder zrüg ir Schwiz bi. Aber zersch giz da immer no paar Sache woni no vor mer ha wie zB ändlech mau uf NYC z gah.. 

Letst Wuche während de Früehligsferie simer zwar nid aus Familie id Ferie oder so aber mir hei glich es paar Usflüg gmacht wie zB ei Tag womer in Philadelphia si gsi. Sorry für di schlächte Biuder aber hie sisi glich:

es het überau so Huswänd wo agmalet si

 s food gseht leider feiner us aus dases isch gsi

  Chinatown

 i bi dr ultimativ tourist gsi

u das het mi eifach dünkt gseht lässig us

När hets z Baltimore ono sones Liechtfestival gha u dört simer gange aber s het viu z viu lüt gha so dasmer chum öpis gseh hei (d Schlangene bi de Kunstwärch si üs eifach z lang gsi). U när hets am haubi eufi ono extremscht afa schiffe u winde u de simer grad wieder hei.

 währendem parkplatz sueche, was öpe 30min duret het

 Inner Harbor

obe Chris, när Jessica, Ricardo und ig

Vor chli meh aus eim Monet het mini Gastfamilie zwöi neui Chatze adoptiert vom Tierheim womer aube ushäufe. Si hei churz drufabe ouno e Hung adoptiert, ä American Bulldog namens Zeus, aber dä isch mite Chatze und em angere Hung nid so guet klarcho drum heisi ne müesse zrüggäh. Aber di beide Chatze si geng no hie: ä jüngere Kater namens Owen und ä euteri Chatz namens Barbie. 

 Barbie

 Owen 

 Zeus (hie usgsproche "Sus")

 der Elvis wo scho sitem Afang isch da gsi

 d Angie wo ou scho sitem Afang isch hie gsi

und no einisch der Owen